Владата на Република Македонија обезбеди четири кредитни линии за долгорочно финансирање за купување, изградба и адаптација на мали сместувачки капацитети до 70 легла со стандард не поголем од оној кој е определен со три ѕвезди, проект кој е дел од Програмата на Владата за 2011-2015 година.
– Владата преку четири кредитни линии под поволни услови со прифатлив и разумен рок на отплата и вклучен грејс-период помага при купување, изградба или адаптација на сместувачки капацитети. Се работи за поттикнување на отворање на нови сместувачки капацитети кои особено во европските држави се масовно искористени и претставуваат значаен дел од обртот на средства во светскиот туризам, а претставуваат и модел за развој на малиот и среден бизнис, рече на денешната прес-конференција владиниот портпарол Александар Ѓорѓиев.
Владата на минатата седница, како што информира,ја усвои Информацијата за расположливи четири финансиски инструменти – кредитни линии кои може да се користат за таа намена. Се работи за ЕИБ-кредитна линија, Инвестициска кредитна линија РФ, Посебен кредитен фонд кредитна линија со гарантна шема и МСП – МБПР кредитна линија.