Земјотрес со Рихтерова локална магнитуда 4.3 се случил денеска во 12.30 часот со епицентар во Албанија, 110 километри западно од Скопје.
– Според досегашните податоци, земјотресот беше почувствуван најсилно во западните делови на Република Македонија, и тоа во Дебар со интензитет од IV-V степени, и Гостивар со интензитет од III-IV степени според Европската макросеизмичка скала, соопшти Сеизмолошката опсерваторија при Природно-математичкиот факултет.
Во Скопје и во југозападните делови од територијата на Македонија – во Кичево, Тетово, Охрид и Битола, земјотресот бил почувствуван со интензитет од III степени според Европската макросеизмичка скала.