Градоначалниците на Град Скопје и на општина Аеродром Коце Трајановски и Ивица Коневски денеска присуствуваа на почетокот на градежните работи за реконструкција на дел од булеварот „Васко Карангелевски“.
– Станува збор за реконструкција на булеварот „Васко Карангелевски“ на потегот од крстосницата со бул. „Јане Сандански“ до крстосницата со бул. „АСНОМ“ кај хотел „Русија“, во должина од 600 метри. Со проектот е предвидено гребење на горниот слој од постојнииот коловоз и нанесување на нов асфалт од типот сплит мастик, рече Трајановски.
Со реконструкцијата на овој булевар кој, како што рече, во моментов е во катастрофална состојба, значително ќе се подобри одвивањето на сообраќајот. Изрази надеж дека градежните работи ќе завршат во текот на септември.
Градоначалникот Коневски истакна дека реконструкцијата значително ќе ги подобри условите во сообраќајот на оваа сообраќајница, ќе им го олесни пристапот на жителите до зградите и ќе придонесе за зголемување на безбедноста.
Покрај санацијата на коловозот, со овој проект е предвидена и санација на рабниците и реконструкција на дел од тротоарите. На терен ќе работат екипите на градежната компанија „Пелагонија“ од Гостивар, а за реализацијата на овој проект Градот Скопје ќе вложи 7,8 милиони денари.