Пред Универзалната сала попладнево почна протестот што вчера го најави таткото на Фросина Кулакова, по објавувањето на пресудата за сообраќајната несреќа во која загина неговата ќерка во јануари годинава на булеварот „Партизански одреди“ во Скопје.
— Во моментов имаме силен сомнеж дека се случува еден цел правен инженеринг. Сега и Врховен суд некој го вклучува и излегува со крајно сомнителен термин, го враќа предметот на Васо за дилерство со дрога повторно на Апелација и тоа од чисто формални причини. Очигледна е намерата со игра на датуми да се створи правна конфузија во целата оваа игра што ни ја прават. Сега одбраната ќе бара на Апелација да му се намали казната, бидејќи како отежителна околност во Судот беше тоа што фактички тој бил дилер на дрога, изјави Тодор Кулаков, татко на Фросина.
Протестот продолжува пред Кривичниот суд во Скопје, каде се очекува да бидат соопштени барања за законски измени.
Возачот Васил Јованов, кој на првото рочиште призна вина и изрази каење за стореното, вчера со одлука на Кривичниот суд беше осуден на казна затвор од 12 години.
Семејството на Фросина вчера пораќа дека не се откажува и дека ќе протестира барајќи оставки и смена на ваквиот, како што рекоа, корумпиран судско-казнен систем.