Штипското претпријатие „Стипион 2011“ и пожарникарите од денеска почнаа со пробивање на запушениот канал меѓу населбите „Сењак“ и „Дузлак“, каде што пред 20 дена се создаде езеро од големите врнежи од дожд.
Градоначалникот на Општина Штип, Илчо Захариев поради големата опасност за децата кои поминуваат покрај оваа езеро, но и создавање свлечиште, кое може да ги загрози куќите и основното училиште „Димитар Влахов“ ангажираше екипи и машини од комуналното претпријатие „Хидро водод“ од Кавадарци.
Директорот на ЈП „Стипион 2011“, Тони Јовев вели дека за еден ден ќе се отпуши цевката, а со што водата од езерото ќе се испушти во правец кон реката Брегалница.
– Поучени од оваа негативно искуство ќе мора почести контроли да се вршат, а во догледно време ќе треба да изработиме и проект за изградба на мост, рече Јовев.
Командирот на ТППЕ-Штип, Кире Патраклиски рече дека пожарникарите и сообраќајната полиција постојано биле во обиколка на овој дел, а во моментов се логистика на екипата од Кавдарци, која го врши испуштањето на водата од создаденото езеро.
Штипјани кои живеат во населбите „Сењак“ и „Дузлак“ потенцираат дека досега езерото претставувало голема опасност за малите деца, но и за куќите кои се во непосредна близина, затоа, според нив, потребно е под итно да се реши проблемот и да се изгради мост.