На 48-годишна возраст утрово почина актуелниот градоначалник на општина Охрид, Јован Стојаноски.
Според првичните информации, причина за смртта е срцев удар. На Стојаноски му се слошило, па во критична состојба бил префрлен на Интерното одделение на Општата болница во Охрид. Бил направен обид да се префрли во Заводот за кардиологија, но залудни биле обидите за реанимација.
Професорот Јован Стојаноски својот мандат како градоначалник на Охрид го започна на 20 октомври минатата година, по победата во првиот круг на Локалните избори.
Проф. д-р Јован Стојаноски е роден во Охрид, на 07.08.1970 година. Дипломирал на Економскиот факултет при Универзитетот „Кирил и Методи“ во Скопје. Во 1999 станал Магистер по Маркетинг, а во 2003 година Доктор по Меѓународен туризам и Маркетинг менаџмент.