Вчера во вечерните часови, ненадејно почина Даниел Милошевски, еден од сопствениците на „Авалон продукција“.
Тој, заедно со постариот брат Бобан важеа за едни од најуспешните во шоу бизнисот во Македонија и на Балканот. Бројката од околу 250 настани и имињата со кои работеа во последнава деценија, ги издвојува како најуспешна концертна и букинг компанија на овие простори.
Изминативе 20 години под капата на „Авалон“ беа организирани концерти на познатите домашни, екс југословенски, но и светски ѕвезди како Боб Дилан, Лени Кравиц, Брајан Фери, Били Ајдол Ајрон Меиден, Дип Парпл, Вајтснејк, Кошер, Симпл Мајндс, а го организираа и последниот настап на Ејми Вајнхаус во Белград. Соработуваа и со Тоше Проевски, Каролина, Ареа, Леб и Сол.
Даниел кариерата во шоу бизнисот ја започна во родниот Гостивар, кога со брат му, во средината на деведесетите години го водеа летниот клуб Авалон. Четириесет и петгодишниот импресарио зад себе остави сопруга и две деца.
Погребот, според најавите од роднините, ќе се изврши утре на гробиштата во скопски Бутел.