Кандидатот за градоначалник на општина Карпош од опозицискиот Сојуз за иднината Андреј Петров ветува дека ако ја добие довербата од жителите на општината ќе инвестира во иднината на здрава и активна младина. Најавува изградба на рекреативен парк за коњички спортови со манеж во Градскиот парк во Скопје и враќање на укинатиот задолжителен час по пливање во базенот Карпош.
– Локацијата за паркот е веќе урбанистички дефинирана во рамките на Градскиот парк, во неговиот западен дел. Планираната површина на градежната парцела на која се предвидува оваа намена е 15.200 метри квадратни, на која ќе се реализираат содржини на отворено и во затворен простор, манеж. Површината на затворениот објект е 3.050 метри квадратни, изјави денеска Петров, најавувајќи дека рокот за изградба е 2014-2015 година, а моделот за реализација јавно-приватно партнерство.
Петров истакна дека централно место во неговата програма е водење сметка за базичните спортови во училиштата, како особено важно за здравјето и развојот на учениците.
– Во мојата програма повторно ќе го вратиме укинатиот задолжителен час по пливање во базенот Карпош и тоа ќе го направиме со плаќање на сите трошоци од страна на Општината, наведе Петров.