Нашето клучно барање, она за постигнување договор за одење на предвремени парламентарни избори е постигнато, рече Андреј Петров, на денешната пресконференција.
„Со еден збор, на локални избори одиме, предвремени избори ќе има!
– Како директен учесник на средбите со меѓународните претставници на кои беше постигнат политичкиот договор сакам да го изјавам следново:
– Прво, договорено е веднаш по локалните избори да се седне на заедничка маса со цел да се утврди тајмингот за следните парламентарни избори. Точно е дека зборот “предвремени“ не е содржан во договорот, и тоа само заради инаетењето на Никола Груевски и неговото инсистирање на формата.
– Содржината и суштината остануваат исти: тајмингот за редовни парламентарни избори е утврден со Устав, а секое седнување на маса и договарање на друг датум значи договор за предвремени парламентарни избори. Конечно, гарант за овој факт се преставниците на меѓународната заедница кои присуствуваа на средбите.
– Второ, ќе се формира Комитет за истрага на настаните околу 24 декември, од чиишто заклучоци ќе произлезе конкретниот договор за предвремени парламентарни избори. Комитетот ќе треба да го констатира она што целата домашна и меѓународна јавност го виде со свои очи, а тоа е дека од страна на власта беше прекршен Уставот на РМ и Деловникот на собранието.
– Трето, пратениците на опозицијата се враќаат во Парламентот со една и единствена цел, а тоа е да се овозможи евентуален почеток на преговорите со ЕУ.
– Благодарни сме им на сите граѓани кои ги поддржаа активностите на Отпорот со што ни помогнаа да ги реализираме нашите клучни приоритети: договор за предвремени парламентарни избори и евентуално деблокирање на евро – атлантските интеграции на Република Македонија.
– Истовремено, ги повикуваме граѓаните заеднички да ја продолжиме битката до победата на претстојните локални избори, а потоа и до конечното рушење на недемократската власт на Груевски“, изјави Андреј Петров.