Досегашниот градоначалник на Охрид Александар Петрески денеска им се заблагодари на сите граѓани кои излегле и гласале за кој било од кандидатите на одржаните локални избори, истовремено честитајќи ја, како што рече, „пировата“ победа на противкандидатот Никола Бакрачески.
– Немам забелешки на мојот тим кој даде се од себе, но ова не беше фер борба и тие не можеа да направат ништо. Но, и партизаните ја започнаа борбата без оружје и опрема против силна воена машинерија која успеаа да ја совладаат. Јас токму така ја споредувам борбата која сега се води во Охрид, рече Петрески.
Во врска со најавите на новата локална самоправа дека ќе спроведе ревизија на досегашното работење на општинската администрација и јавните претпријатија, Петрески истакна дека воопшто не се плаши од тоа бидејќи, подвлече, седум години работел со постојана државна ревизија, и од страна на инспекциските и од полициските органи.
– Јас ревизија постојанио имав додека работев, но сега ќе треба тие да се подготват за ревизија за досегашното работење, а секако и за наредното работење кое им престои, додаде Петрески.