На Факултетот за ветеринарна медицина се регистрирани петмина заболени од Ковид – 19, а уште неколкумина пројавиле симптоми, но се уште не се тестирани, велат за „А1он“ извори од факултетот кои бараа да останат анонимни. Дел од оние со симптоми се во самоизолација, но има и дел од нив кои продолжиле да доаѓаат на работа.
„Дел од вработените доаѓаат на работните места иако се жалат на изнемоштеност и покачена температура. Друг дел колеги, пак, решија да останат во самоизолација бидејќи не се тестирани, не знаат дали се заразени и не сакаат сите останати да ги доведат во опасност “, велат од факултетот за „А1он“.
Факултетот работи непречено. Студенти доаѓаат секојдневно оти има испити кои се одржуваат со физичко присуство. Со ова, се зголемува и стравот кај вработените и кај студентите дека Ветеринарниот факултет може да претставува нов кластер заразени од Ковид-19.
Дополнителен проблем, според нашите извори, претставува фактот што дел од студентите кои се ангажирани во наставата, немаат здравствено осигурување.
И студентите и вработените се прашуваат како ќе продолжи наставниот процес по петте регистрирани случаи на заболени.