Претседателот на Комисијата за заразни болести Александар Петличковски најави дека во следниот период, по стивнувањето на овој бран на коронавирус, ќе се посветат на зголемување на процентот на вакцинирани. Пораките со потсетување за вакцинација кои ги испраќаат на лицата кои се во ризичните групи, односно оние со хронични заболувања и лицата над 65 години, вели дека дале резултат.
„Сакам да потенцирам дека оваа моментална состојба ни дава простор малку да здивнеме. Но во тој простор кога здивнуваме aпсолутно ќе се посветиме на вакцинацијата и на објаснување зошто ние не ја заклучивме пандемијата. Ние не знаеме што ќе се случи по месец дена, не па по два или три месеци. Во ова меѓувреме вакцинацијата ни останува клучната алатка во борба против пандемијата. Имавме интензивирање, праќање пораки, тоа ќе го засилиме затоа што има резултат. Има одговор на потсетувањето дека е добро да се вакцинираат прво тие со поголем ризик, но понатаму и оние кои примиле две дози, а поминало доста време од втората доза. Во моментот стандард за заштита е три дози вакцина. Тоа интензивно ќе го објаснуваме’, рече претседателот Петличковски.
Комисијата денес соопшти дека ризикот од ширење на Ковид – 19 е намален и земјава се наоѓа во зелена фаза што им дало за право да продолжат со олабавување на мерките. Оваа недела ќе предложат на Владата да се укинат маските во основните училишта за учениците, но да останат за наставниците и административно – техничкиот персонал, да се укинат сертификатите во отворените делови од угостителските објекти исполнетоста на театрите и кината од сегашните 50 да се зголеми на 70 отсто.