Шефот на државата, Стево Пендаровски, утре (четврток), мандатот за состав на Влада ќе му го довери на претседателот на СДСМ, Зоран Заев. Одлуката на Пендаровски доаѓа два дена пред истекот на рокот за доделување на мандатот, а откако, добил известување од Заев дека коалицијата „Можеме“ обезбедила мнозинство во Собранието.
„Зоран Заев, во име на коалицијата ‘Можеме’, којашто има освоено најголем број пратенички мандати во Собранието, го информираше претседателот Пендаровски за преговорите со повеќе партии за обезбедување на неопходното мнозинство во Собранието за избор на владата“, велат од Кабинетот на Пендаровски.
Сега, Заев како мандатор, во рок од 20 дена од денот на доверувањето на мандатот, на Собранието треба да му поднесе програма, заедно со предлаг за составот на Владата.
Владата, на предлог на мандатарот и врз основа на програмата, ја избира Собранието со мнозинство гласови од вкупниот број пратеници.