Универзитетот „Св. Кирил и Методиј“ денеска во соработка со Амбасадата на Полска ја одбележа 55-годишнината од полонистиката во Македонија.
Во Ректоратот на скопскиот Универзитет, полскиот амбасадор Јацек Мултановски оцени дека Македонија и Полска имаат добри односи и оти соработувајќи може да придонесат за нивно уште поголемо интензивирање и продлабочување.
– Не поврзуваат многу работи. Полска ја поддржува Македонија на патот кон евроалтанските интеграции, а многу динамично се развиваат и контактите во разни дејности, истакна Мултановски.
Заменик-министерот за образование и наука Спиро Ристовски најави дека Владата и Министерството за образование ќе продолжат со негување на добрите пријателски односи со Полска.
– Посебно значајни се интензивирањето на соработката во делот на размената на научни и образовни искуства по потпишувањето на меморандумот за соработка во делот на високото образование. Верувам дека со ваквата конкретна соработка значително ќе се зголеми квалитетот на знаење кај студетните кои ќе имаат можност да студираат во Полска, како и изучувањето и промоцијата на македонскиот јазик на катедрите на полските универзитети, рече Ристовски.
Според ректорот на скопскиот Универзитет, Велимир Стојковски, академската соработка во полето на истражувањето е вистинскиот пат за да се биде дел од заедничкиот европски образовен систем.
Во рамки на одбележувањето ќе се одржи и дебата за трендовите и перспективите на полскиот јазик и предавање „За 60 минути околу Полска“, а ќе настапи и групата Жешов Клезмер Бенд.