Полициски службеници од Секторот за внатрешни работи Тетово последните неколку дена, на различни места во Тетово пронашле контраверзен политички пропаганден материјал, соопшти Министерството за внатрешни работи.
– Памфлетите, изработени во неколку верзии на македонски јазик, во негативен контекст и со негативна конотација, најдиректно го дисквалификуваат и дискредитираат едниот од двајцата кандидати за градоначалник на општина Тетово, а навивачки го фалат, поддржуваат и им сугерираат на граѓаните да гласаат за другиот кандидат, информира МВР.
Пронајдените памфлети се фотодокументирани и се работи на откривање на нивните изготвувачи и дистрибутери.
СВР Тетово апелира до граѓаните и до сите учесници во изборниот процес да се воздржат од вакви или слични постапки, односно провокации и да се однесуваат фер и демократски.
Ваквите провокации можат да ја нарушат општата изборна атмосфера и амбиент во Тетово и да предизвикаат несакни појави, со сериозни последици во севкупното тетовско секојдневие.
