Граѓаните ќе можат да прашаат и дискутираат за сите прашања од областа на урбанизмот во општина Центар.Утре, со почеток во 10 часот, во салата на Советот на општина Центар, Центарот на заедницата на општина Центар организира отворен ден со Комисијата за урбанизам, планирање и уредување на просторот на Советот на општина Центар и раководителите од секторот за урбанизам и секторот за уредување на градежно земјиште и заштита на животна средина.
Отворениот ден има за цел да овозможи запознавање на граѓаните со надлежностите на Комисијата за урбанизам, планирање и уредување на просторот како и вклучување во работата на Комисијата преку предлози и идеи. Исто така граѓаните ќе имаат можност да ги изнесат своите проблеми поврзани со урбаното планирање и урбаното уредување пред надлежните претставници од општина Центар.
Вториот, од серијата отворени денови кој ги организира Центарот на заедницата на општина Центар е продолжение во остварувањето на долгорочната цел за вклучување на граѓаните во донесувањето на одлуки на локално ниво, поголема транспарентност во работата на Советот на општината и отвореност кон граѓаните.