По повод 30 години од независноста на нашата држава, во Министерството за надворешни работи денеска беше отворена првата архивска изложба на Министерството насловена „30 години независност- ретроспектива на надворешната политика“.
Министерот за надворешни работи Бујар Османи на отворањето истакна дека оваа е прва архивска изложба на МНР во која прават првичен обид да се даде сеопфатна и длабинска слика за надворешната политика на Република Северна Македонија од нејзината независност до денес. Тој најави дека на среден рок планираат и создавање на траен музеј на основни архивски документи од значење на државата.
– Како што можете да видите, објавуваме интересни документи, записи и фотографии преку кои се прикажани почетоците на нашата дипломатија од независноста, развојот на надворешните односи и достигнувањата на нашата земја. Во функција на транспарентноста, но и како начин за промоција на нашите вредности, со оваа изложба фактички започнуваме целосно нов концепт на тематско изложување на дипломатски архивски документи, записи и наследство кои се од значење за домашната и странска јавност. Дополнително, на еден среден рок за оваа цел планираме и создавање на траен музеј на основни архивски документи од значење на државата, рече тој.
Османи посочи дека она што и самата изложба го покажува е тоа дека уште од нејзиното осамостојување Република Северна Македонија експлицитно и недвосмислено се определила кон европските и евроатлантските вредности. Со текот на времето докажувајќи ја својата определеност кон мирољубиви решенија и градење на мултиетничка и мултикултурно општество, како што рече министерот Османи, земјата успешно се позиционираше на меѓународната сцена и покажа дека иако мала земја може да воспостави билатерални односи со голем број земји од различни региони во светот и да биде значаен партнер на меѓународната заедница.
– Во овој контекст неминовно е да се споменат трите значајни столбови на кои се потпира нашиот успех и кои што со сигурност може да се каже дека претстатуваат и парадигма за нашата посветеност и мирно решавање на прашањата – Охридскиот рамковен договор, Договорот за пријателство со Бугарија и Договорот за стратешко партнерство со Грција познат како Договорот од Преспа. Круна на нашите стратешки цели беше полноиправно членство во НАТО и се надевам дека истото ќе го кажеме во догледна иднина во однос на нашите искрени аспирации за полноправно членство во Европската унија, истакна Османи.