Основен суд Скопје 1 реагира дека не ја одолговлекува или избегнува правдата во случајот „Пуч“.
„Нејасна и тенденциозна е изјавата во јавноста дека судот е тој што ја
опструира работата на Јавното обвинителство за гонење на кривични дела поврзани и кои произлегуваат од незаконското следење на комуникациите (СЈО), при што јавно се прозива Кривичниот суд како законски единствен стварно и месно надлежен суд дека не поседува сертификат за пристап до класифицирани информации наспроти странките, со што јавно се девалвира и навредува улогата и позицијата на судот и судиите во постапката, а со политички говор се издигнува улогата на СЈО.
И појаснуваме на јавноста дека во конкретната ситуација не е спорно дали некој има или нема сертификат да врши увид и да работи со списите на предметот во кој има класифицирани информации и ова за судот е расчистено прашање. На СЈО му е дозволен непречен увид во секое време во сите списи на предметот.
Замената на тезите дека некој има сертификат или нема не соодејствува со барањата на СЈО, судот не може спротивно и со повреди на Законот за класифицирани информации да се претвори во фотокопирница и копира класифицирани списи и докази, за што нема такво овластување, а кое нешто го појаснивме во нашето вчерашно соопштение.
Ги повикуваме обвинетите лица во наведената постапка да не ја злоупотребуваат постапката за политички говори како директен напад и непочитување на институцијата суд и на овој начин да вршат притисок врз работењето на судот.“, стои во реакцијата на Основен суд 1 Скопје.