Под мотото „Поблиску до природата“ во организација на тимот на ОУ „Петар Поп Арсов“ од село Богомила и тимот на Општина Чашка денеска во селото Ореше се одржа традиционалниот осми Саем на здрава храна.
На саемот на здрава храна, мед, чај, ореви, печурки, компири… продаваа локалните земјоделци од овој еколошки чист регион од Општина Чашка и тоа од селата Извор,Стари град, Владиловци, Мартолци, Оморани, Согле, Теово, Богомила, Бежилово и Ореше.
– Целта на саемот е промовирање на локалните земјоделци и производители на храна, локалните специјалитети, традиционалните носии и рачни изработки, појасни Горан Пановски градоначалник на општина Чашка.
Посетителите воедно имаа можност да дегустираат и специјалитети од здрава храна подготвени од домаќинките од овој регион, а манифестацијата беше збогатена и со културно уметничка програма во изведба на ученици од овој крај.