Вицепремиерот за европски прашања Бујар Османи денеска се сретна со Постојаниот координатор на УНДП и постојан претставник, Луиза Винтон.
Како што соопшти СЕП, Османи изразил благодарност до Винтон за нејзиниот досегашен професионален и личен ангажман и одличната досегашна соработка, и при тоа и двајцата се согласиле дека УНДП во претстојниот период може да даде голем придонес во активностите кои Владата ги презема за враќање на земјата на патот на ЕУ.
– Имавме напорен и динамичен месец, го финализиравме Планот 3-6-9, време е да почнеме да испорачуваме. Свесни сме за големите очекувања од граѓаните и тоа преставува уште еден предизвик за нас да ги вложиме сите расположливи механизми за да ги адресираме итните реформски приоритети, рече Османи.
Со оглед на меѓународното и регионалното искуство, вицепремиерот Османи истакна дека очекува УНДП да продолжи да ја поддржува земјата и понатаму во процесот на евроинтеграција.
Тој нагласи дека УНДП е долгогодишен партнер на Македонија, кој дава поддршка во областите на децентрализација, социјална инклузија, животна средина, опоравување и реконструкција во случај на катастрофи, меѓусекторски и заеднички програми, и се надева дека таквата соработка да се продлабочи и унапреди. Секако размената на искуства во искористувањето на ИПА фондовите би било дополнителен придонес во успешната соработка.