Со ветување дека ќе реализира голем број инвестиции доколку добие уште еден мандат, Руфи Османи кандидатот за градоначалник на општина Гостовар и лидер на Националната демократска преродба (НДП), вечерва повторно ја побара довербата од гостиварчани.
– По четири години, пред вас излегувам со бел образ, со извештај за сработеното и програма која ќе ја реализраме во целост. Само политичките далтоности од ДУИ и лицето НБ тоа не можат да го видат и лажат дека гостиварската општина била изолирана, рече Османи на митингот во спортската сала во Гостивар.
Во своето обраќање потсети дека со напорна работа и посветеност, со своите соработници успеале да вратат долгови во висина од 6 милиони евра и, како што рече, да отворат нови перспективи за развој.
– Гарантираме во наредните четири години инвестиции 20 милиони евра во повеќе сфери. Парите се обезбедени, па така гостиварската општина ќе добие, филтер станица, булевари со нов асфалт, спортски сали во Дебреше и гимназијата, реконструкција на водоводната мрежа нов мост и ќе спроведеме гасификација, подвлече Османи.
Во говорот, тој се осврна и на коалицијата со Демократската партија на Турците, нарекувајќи ја историски договор кој ги надминува досегашните рамки на соработка и, како што нагласи,со тоа се враќаат вредностите на меѓусебното почитување.
На предизборниот митинг под мотото „Продолжуваме со промени“, беа претставени кандидатите за членови на советите на општините Гостивар и Врапчиште.
Од говорницата, се обратија и канадидатите за градоначалници на општина Врапчиште, Јусуф Хасани и на Тетово Изет Зеќири и лидерот на ДПТ, Ќенан Хасипи кој зборуваше на турски и албански јазик.