Вицепремиерот за европски прашања Бујар Османи денеска оствари средба со Амбасадорот на Француската Република, Кристиан Тимоние.
На средбата, како што соопшти неговиот Кабинет, вицепремиерот Османи истакнал дека соработката со Франција, која има историски значајна улога во процесот на одлучување во ЕУ, е од голема важност за Македонија, особено отворената поддршка за интеграција на Македонија во ЕУ и во НАТО.
Вицепремиерот подвлекол дека позитивната клима по неодамнешната посета на Брисел, и остварените средби со високите претставници на Европската унија и НАТО, ќе се искористи како дополнителен поттик да се внесе нова енергија во спроведувањето на европските реформи.
– За нас од суштинско значење е да се отстрани условеноста на препораката на Комисијата за отпочнување на преговорите за пристапување, порачал Османи.
Посочил дека треба да се работи заеднички и посветено со цел да се придвижи Македонија кон европското семејство со вклучување на сите кои може да придонесат во процесот, нагласувајќи го придонесот и континуираната поддршка на претставниците на меѓународната заедница во земјата.
Најавената посета на Еврокомесарот Хан и Прибе со неговиот тим според Османи е уште една потврда за обновувањето на реформскиот процес.
Османи и Тимоние се согласија дека проширувањето на Унијата кон земјите од Западен Балкан мора да продолжи и дека Македонија нема друга алтернатива освен евроатлантската интеграција.