Заменик претседателот на Владата задолжен за европски прашања, Бујар Османи, одржа состанок со новиот постојан претставник на УСАИД во Македонија, Дејвид Атебери, соопшти денеска СЕП.
На средбата вицепремиерот Османи го информира Атебери за работата на Секретаријатот за европски прашања, нотирајќи ги надлежностите и политичката агенда. Тој го посочи моменталниот фокус на Владата на РМ, но и на СЕП, во подршка на реформискиот процес преку Планот 3-6-9 и Мастер планот за ИПА.
Атебери, пак, пред Османи го презентираше портфолиото на УСАИД со сите области и конкретни проекти што се спроведуваат во Република Македонија. Притоа потенцираше дека УСАИД целосно ја поддржува македонската Влада за унапредување на процесите за евро-атлантска интеграција. Атебери истакна дека УСАИД е партнер на Република Македонија во последните 25 години, а главните три области на кои делува се демократија и владеење, економски раст и образование, во кои се во тек повеќе проекти.
Османи и Атебери се согласија дека донаторската подршка е секогаш добредојдена во финансирање на реформските процеси на Владата на Република Македонија, заради скапите инвестиции во човечки капитал и инфраструктурата. Двајцата соговорници се согласија околу принципите на идната соработка, истакнувајќи ја важноста на донаторската координација која е во надлежност на СЕП.
На крај беше истакнат интересот на двете страни да соработуваат интензивно за наредната Развојна стратегија на УСАИД за Република Македонија која треба да се доврши до крајот на 2017 година, а се договорија и за редовната координација и размена на искуства во области каде УСАИД има компаративни предност во испорачување на потребната подршка на РМ, се вели во соопштението од СЕП.