Градоначалникот на општина Ѓорче Петров Сокол Митровски беше во посета на белградската општина Звездара, на покана на градоначалникот на општина Звездара, Милош Игњатовиќ.
На средбата, како што денеска соопшти Општина Ѓорче Петров, двајцата градоначалници разговараа за идната меѓусебна соработка на образовен, спортски, културен и стопански план.
Митровски и Игњатовиќ изразија задоволство од средбата и се договорија збратимувањето на двете пријателски општини да се случи во најскоро време.
На средбата се разговарало и за можностите двете општини со заеднички проекти да настапат пред меѓународните фондови.
– Градоначалникот Игњатовиќ се интересираше за искуствата на Македонија и општината Ѓорче Петров за привлекување странски инвеститори со што би се овозможило отворање нови работни места. Градоначалникот Митровски официјално го покани Игњатовиќ да ја посети Македонија и општината Ѓорче Петров, се наведува во соопштението од општината.