Штипјани веќе со месеци живеат во страв дека ќе бидат жртви на кучиња-скитници, чиј број од ден на ден сè повеќе расте.
По скандалот со измачувањето и нехуманиот третман врз кучињата-скитници што ја потресе јавност во октомври минатата година, Ветеринарната станица во Штип без објаснување го раскина договорот за ерадикација на кучињата-скитници, па оваа должност веќе со месеци никој не ја извршува.
По цели девет месеци Општината конечно одлучи да распише нов тендер за ерадикација на кучиња-скитници, иако тоа требаше да го стори уште по завршувањето на изборите. Причината за ваквото доцнење според градоначалникот на Општина Штип е недостатокот на финансиски средства во општинската каса.
„Распишавме тендер за згрижување на кучињата-скитници. Во моментот во градот имаме околу 20 проблематични кучиња, кои мораме веднаш да ги згрижиме, а каде што не доаѓа предвид за кастрација. Мораме да внимаваме на законските обврски и на моралните принципи и веруваме дека оној што ќе биде избран на тендерот наскоро ќе ја заврши работата“, изјави Илчо Захариев, градоначалник на општина Штип.
До градоначалникот веќе е пристигната иницијатива од страна на приватно лице, кое бара дозвола да формира привремен центар за згрижување кучиња, каде што ќе ги негува и ќе ги третира, а потоа кучињата ќе бидат пренесени во некои од западноевропските земји, каде што ќе бидат дадени на посвојување.
Иако во моментот на штипските улици талкаат над 500 кучиња-скитници, општината, сепак, во наредните два месеци ќе згрижи и ќе третира само околу дваесетина за кои ќе констатира дека се заболени и преставуваат потенцијална опасност за здравјето на граѓаните.
Кога овој проблем ќе добие конечна разрешница сè уште никој од надлежните не знае.
М.Р.