Општина Неготино реализираше проект со грчка Алмопија. Во негови рамки денеска неготинската локална самоуправа му даде простории за користење на Здружението на пчелари “Неготински мед”. Градоначалникот Ванчо Апостолов потсети дека беа реализирани повеќе активности од програмата за меѓународна соработка.
– Изграден беше пчелин парк во селото Вешје, дел од патниот правец Горни Дисан-Вешје, доделивме опрема за пчелари, рече Апостолов, нагласувајќи дека овој проект беше успешно финализиран.
Претседателот на “Неготински мед“ доктор Миле Тошев нформираше дека здружението е формирано на 7 мај оваа година и брои шеесетина членови.
– Во него меѓу првите влегоа сите оние кои беа дел од соработката со грчката општина. Всушност и самото формирање на друштво се изроди конкретно од тој проект. Ние постоечките пчелари ги поддржавме нашите колеги почетници и се создаде едно јадро за понатамошно дејствување. Интересот е огромен. Очекуваме бројката да достигне до стотина членови. Отворени сме како здружение и за пчелари од целиот Тиквешки регион, нагласи тој во изјава за медиумите.
Тошев соопшти дека цел им е да го брендираат неготинскиот мед како производ со географско потекло, кој има свои карактеристики и традиции. Информираше дека во постапка е со самиот проект да се изврши и брендирање со цел медот да биде препознатлив во земјава и странство.
Појасни дека производството на мед кое е исплатливо финнансиски, на почетокот бара соодветна инвестиција која подоцна се враќа
– Најважно е само да се пројави интерес и да се стартува со поддршка на своевиден ментор. Едукацијата е исто така примарна стратегија на друштвото во иднина, додаде тој.
Се осврна дека меѓу народот е најпознат медот, но рече дека и останатите пчелни производи како прополис, полен, матичен млеч, восок, треба редовно да се користат бидејќи станува збор за природни ресурси кои пчелата ги дава за консумација во еколошка чиста форма.
– Сите тие се добри за да се одржи здравствената состојба на човечкиот организам и треба количината мед која нашиот македонски граѓанин ја троши, да се зголеми многу повеќе. За да се стаса нивото на високо развиените земји каде се консумира многу повеќе мед. Генерално треба да се подобри културата на употреба на пчелни производи. А ќе се подобри со квалитетен мед со гарантиран квалитет. Анализите на нашиот мед покажаа дека имаме врвни параметри за квалитет, рече Тошев.