Општина Карпош со Град Скопје и со Министерството за животна средина и просторно планирање ќе преземе итни мерки за намалување на загадувањето на воздухот. Ќе се формира експертски тим кој ќе треба да ги разгледа сите спорни ДУП-ови. Ова денеска го изјави градоначалникот на Карпош Стеафан Богоев.
За следната година најави реализација на проекти кои треба да го решат проблемот со паркирањето. Заедно со Агенцијата за млади и спорт во Карпош ќе се гради еден од реонските базени, фитнес зони, паркови за миленици…
Богоев ги демантира обвинувањата изнесени од, како што рече, некои политичари и од некои медиуми. – Никој не е избркан од работа. Се работи за 42 лица на кои договорот за работен ангажман во општина Карпош им е истечен. Дел од нив воопшто не оделе на своето работно место, а земале плата од општината која е во потешка состојба, а дел биле ангажирани на позиции на кои во моментов нема потреба да бидат бидејќи и онака е пренатрупано. Не се работи за политички реваншизам, изјави Богоев.
Тој појасни дека во моментов има околу 130 лица со договор на дело, а уште 90 со договор на дело кои се грижат за хигиената на општината.
– Општина Карпош во моментов има околу 400 вработени, рече Богоев. Додаде дека Карпош е една од превработените општини во Македонија.