Локалната самоуправа почна акција за уривање на бесправно изградени објекти на територијата на општина Гостивар.
Во наредниве две недели се очекува да бидат урнати уште шест објекти, за кои инвеститорите не ги обезбедиле потребните документи.
Од службата за информирање на општина Гостивар потврдија дека акцијата почнала со уривање на еден ѕид во населбата Питарница, изграден без соодветна дозвола и на локација на која е предвидена улица.
– Со уривањето на овој ѕид, во иднина ќе се овозможи слободно движење на возилата на тој дел од населбата Питарница. Општина Гостивар ќе продолжи со уривање на бесправните градби, како што се ѕидовите кои зафаќаат дел од улиците, доградби, како и станбени објекти кои се изградени бесправно, велат од општина Гостивар.
Од Секторот за урбанизам упатуваат апел до граѓаните да не градат без соодветна дозвола, бидејќи ќе се соочат со мерки.