Општина Центар започна со санација на сутеренските простории на објектот на ООУ „11 Октомври“ во населба Пролет.
Овој дел од училиштето беше оштетен од поплавата во 2015 година и од тогаш е надвор од употреба. Се стругаат, глетуваат и молерисуваат ѕидните површини, се фарбаат радијаторите и столаријата со мрсна боја. Ќе бидат заменети вратите од просториите кои беа оштетени од поплавата. Уништените подови од ламинат се заменуваат со нови од винилна облога. Со ова ќе се овозможи непречено одвивање на наставата.
Покрај овие две училници, ќе се изврши санација и на кабинетите по музичко и ликовно, работилницата, архивата како и три помошни простории. Општина Центар и за ова, како и за другите училишта кои се на нејзина територија, нарача од ЈП „Водовод и канализација“ да направи физичко-хемиска и микробиолошка анализа на квалитетот на водата и инсталациите. Анализата треба да биде готова до почетокот на учебната година. Паралелно со ова се врши пренасочување на фекалната канализација за да се надминат проблемите со запушувањето и непријатната миризба.
Ќе се обнови уништената пристапна патека, а проблемот со излевањето од олуците ќе се надмине со насочување во канал со метални решетки.
Целиот зафат за значајната реконструкција и санација е договаран на средбите на градоначалникот на општина Центар Андреј Жерновски со родителите и со наставниците, со цел да се создадат сите услови за квалитетен образовен процес.
Градежни активности се одвиваат паралелно и во ООУ „Св. Кирил и Методиј“, ООУ „Коле Неделковски“ и ООУ „Гоце Делчев“.
