„Во рамките на проектот „Работно лето 2015“, општина Центар започна со хортикултурно уредувавање на просторот во Градски Ѕид, популарното Индијанско маало, делот од Дом на градежници до бул. „Партизански одреди“.
На површина од 4700 м2, предвидено е пејсажно дизајнирање на просторот. Визија е да се направи склоп од идеи за зонирање и урбано заживување на оваа локација, естетско моделирање на зеленилото и делот со урбана опрема за одвивање на активен и пасивен одмор“, соопштуваат од Општина Центар.
„Ќе биде засадено со растенија прилагодени на просторот и климатските услови, лесни за одржување со природна, а не строга обликувана форма. Ќе бидат засадени листопадни и зимзелени дрвја и околу 5000 зимзелени ниски и високи грмушки, кои ќе бидат надополнети со едни од најубавите украсни дрвја, меѓу кои се магнолија и кедера, а ќе гравитира околу три блокови згради, пет кули и помали згради. Ќе биде поставен систем за наводнување со автоматски прскалки и систем капка по капка.
Во рамки на урбаната опрема ќе биде изградено и ново детско игралиште по европски стандарди, со гумен заштитен под, а ќе бидат поставени и парковски клупи и друга урбана опрема“, се вели во соопштението на Општина Центар.
