Општина Центар изминатиот месец започна со реконструкција на улицата „9-ти Мај“ во населбата Буњаковец, улица со ударни дупки и асфалт, која последен пат е реконструирана во 2009-та година.
При реконструкцијата, од Општината информираат дека увиделе дека дебелината на поставениот слој на асфалтот е само три сантиметри, односно дури три пати помало од она што е предвидено во проектот за последната реконструкција, изработен во 2007-ма година.
Општината Центар известува дека за улицата „9-ти Мај“ веќе е отпочната постапката за вештачењето на фактичката состојба на улицата во изминатите 11 години.
„Вештачењето ќе се изврши врз парчињата асфалт извадени од самата улица и од постоечката документација за улицата. Сакам да напоменам дека ќе ја ограничиме истражната постапката на периодот од 2007-мата до 2009-тата година“, изјави градоначалникот на Општина Центар, Саша Богдановиќ.
Ова ограничување на постапката, додаде Богдановиќ, е со цел да избегнеме ширење на шпекулации со имиња и одговорност, со единствена цел – да добиеме непристрасна и објективна постапка, која подоцна ќе послужи како основа за понатамошни активности кои општината ќе ги преземе за утврдување на одговорноста во досегашната состојба со улицата „9-ти Мај“.
Општина Центар периодов е активна со реконструкција на повеќе улици на нејзина територија, меѓу кои е и улицата „9-ти Мај“, каде стариот асфалт веќе се заменува со нов, со дебелина од 9 сантиметри, а ќе се изведат нови тротари и улицата ќе добие нова урбана опрема и зеленило, велат во соопштението.