„Конечно е надминато недоразбирањето со Министерството за финансии. Министерот ги одобри барањата за неопходните вработувања за новата градинка во општина Центар, „Кочо Рацин“.
Денеска е објавен огласот, а по Божиќните празници градинката ќе профункционира со полн капацитет.
Во моментот работат седум групи кои згрижуваат и воспитуваат деца од 2-6 години, а со новите вработувања трите групи јасли ќе примаат деца до две годишна возраст.
Со оваа одлука ќе се реши проблемот и за двете групи во објектот „Наум Наумовски Борче“. Проблемот датира од февруари месец 2015 година и по десеттината барања и ургенции сега е одобрено ангажирање на шест негуватели, еден воспитувач, двајца хигиеничари, еден доктор и еден помошник готвач.
„Кочо Рацин“ е најголемата и најсовремена градинка во Република Македонија. Освен естетски пријатниот изглед, објектот има енергетски ефикасна фасада, подно греење, винил облога која е анти алергена, кујна со лифт за храна и функционални занимални, тоалети и простории за одмор.
Градинката има површина од 2.800 м2“, се вели во соопштението на Општина Центар.