Општина Центар, во соработка со Градот Скопје и ЈП Паркови и зеленило Скопје, спроведува акција за уредување на јавни зелени површини на целата територија на Општината.
Акцијата опфаќа косење на тревници, кастрење грмушки и сечење на суви, стари и деградирани дрвја.
Се отстрануваат гранките кои беа потенцијална опасност за минувачите и возилата.
Во текот на минатите денови, спроведена е акција за кастрење на грмушки по должина на улицата Димче Мирчев, потоа по должина на улицата Белградска, над Клинички Центар, уредување на целиот комплекс зеленило во подножје на црквата „Св. Јован“, како и кастрење на грмушки кај скалите кај ресторанот „Два Елена“ и кракот на ул. Питу Гули.
Со акцијата, се уредија локациите и се овозможи движење на минувачите по пешачките патеки покрај коловозите.
Во текот на акцијата, спроведено е сечење на сувите брези по должина на улицата Народен Фронт до ТЦ Беверли Хилс.
Редовно, се спроведува косење на јавните зелени површини. Во текот на минатите денови, искосени се површините во населбите: Пролет, Маџир маало, Кале и Капиштец.
Во акцијата учествуваа екипите на ЈП Паркови и зеленило со механизација, како и работниците ангажирани за јавна чистота од Општина Центар.