Општина Богданци денеска го објави јавниот повик за финансирање културни и спортски активности со средства од општинскиот буџет за 2019 година, на кој право на учество имаат здруженија на граѓани и други правни лица од областа на културата и спортот што дејствуваат на територијата на општината.
Според критериумите за финансирање, сите апликанти имаат обврска да дадат придонес во збогатувањето на културниот и спортскиот живот, да ја реализираат утврдената програма со која конкурираат, да ги поттикнуваат и афирмираат културното творештво и спортските активности, да се грижат за стручната работа и усовршување на кадрите, да обезбедат континуитет на традиционалните локални манифестации и да не вршат политичко и верско организирање и дејствување.
Пријавите за учество на јавниот повик, со потребната документација и отчет за сработеното во тековната година, треба да се достават до архивата на локалната самоуправа во Богданци најдоцна до 2 ноември.