Веселите и разиграни основци од ООУ „Братство“ денеска, на специфичен начин го одбележаа својот патронен празник. Помогнати од живописната костимографија кои самите ја подготвија, учениците се претставија со драматизација на „Шеќерната приказна“ од Славко Јаневски, изведоа неколку балетско-музички точки збогатени со нежните звуци на акустичните гитари.
Сепак, највпечатлива беше кратката приредба на која учениците ги искажаа своите слободни мисли и идеи на повеќе јазици. Со овој симболичен гест, тие го истакнаа мултикултурниот карактер, кој веќе долги години е нераскинлив дел од ова основно училиште. Во рамките на оваа свеченост присуствуваше и првиот човек на општина Карпош, Стевчо Јакимовски.
За крај, основците од „Братство“ испратија силна порака до присутните – „се почитуваме и другаруваме, без разлика на кој јазик зборуваме“.