Народниот правобранител Иџет Мемети и британскиот амбасадор во Република Македонија, Чарлс Едмонд Гарет, на денешната средба разговарале за актуелната состојба во општеството со посебен акцент за превенција и заштита на човековите слободи и права, како и за можностите и предизвиците со кои се соочува институцијата.
На средбата, народниот правобранител го информирал амбасадорот за состојбите со човековите слободи и права, посебно за актуелните предмети по кои постапува, за прислушувањето, средношколските протести, постапувањето на полицијата за време на протестите и ограничувањето на истите.
Во текот на средбата соговорниците разговарале и за последните случувања во Куманово, при што изразиле сериозна загриженост за состојбата и потребата од ефективна и транспарентна истрага.
Амбасадорот Гарет ја потенцирал важноста на улогата на институцијата во општеството, имајќи ги предвид состојбите во државата, владеењето на правото и довербата на граѓаните во институциите.
Како што се наведува во соопштението од кабинетот на Мемети, амбасадорот Гарет ја истакнал важноста и потребата институциите да соработуваат со народниот правобранител и да не го попречуваат во извршувањето на функцијата.
Двајцата соговорници се согласиле за потребата од продлабочување на соработката, особено во делот на промоција на човековите слободи и права.