Основното јавно обвинителство ја отфрли кривичната пријава против новинарот Бранко Тричковски за сторени кривични дела „загрозување на сигурноста“,„убиство на претставници од највисоките државни органи“, „раздор“, „повикување на насилна промена на уставникот поредок“ и друго. Пријавата против новинарот Тричковски ја поднеле претседателот Ѓорге Иванов и лидерот на ВМРО-ДПМНЕ, Христијан Мицкоски.
„Јавниот обвинител ја анализираше објавената колумна на пријавениот, како и неговите објави на една социјална мрежа кои беа предмет на известувањето доставено од Секторот за компјутерски криминал и дигитална форензика при Министерството за внатрешни работи. По проучување на сите елементи, јавниот обвинител оцени дека пријавените дела не се дела за кои се гони по службена должност, односно дека во пријавените предметни настани не се содржани суштествените обележја на пријавените кривични дела“, велат од Основното јавно обвинителство.
Јавниот обвинител при донесување на одлуката се водел од праксата на Европскиот суд на човекови права и обврската да се обезбеди заштита на слободата на говорот во демократско општество.
„Имајќи го предвид тоа што пријавениот во овој предмет е новинар, а оштетените се политичари. Пресудите на Европскиот суд упатуваат на фактот дека иако политичарите имаат право на еднаква заштита како и сите други, границите за новинарите се пошироки за изнесување критицизам и мора да се избалансирани со јавниот интерес за отворена дискусија во однос на политички прашања. Пријавениот во својот исказ пред јавниот обвинител потенцирал дека никогаш немал вистинска намера да изврши кривично дело, туку со изнесените ставови само сакал да апелира кон наведените политичари да го променат своето однесување“, додаваат од Основното јавно обвинителство.
Јавниот обвинител констатирал дека слободата на изразување не е апсолутно право и дека пријавениот во изразувањето на своето мислење не ја негувал културата на говорот и етиката, па со тоа ги повредил честа и угледот на споменатите политичари.
„Со оглед на тоа, во пријавените предметни настани не постојат обележја на кривично дело за кое се гони по службена должност, но тие би биле предмет на постапка за утврдување одговорност и надоместување на штетата согласно со Законот за граѓанска одговорност за клевета и навреда. Надлежен за ваква постапка е основниот суд според местото на извршување на навредата“, велат од ОЈО.