Охридската полиција заплени вкупно 33 килограми опојна дрога марихуана, пронајдени при проверка на патничко возило марка „Фолксваген Пасат“, управувано од албански државјанин.
Како што соопшти портпаролот на СВР Охрид, Стефан Димоски, проверката била спроведена на магистралниот пат Охрид-Кичево, во близина на излезот кај селото Волино.
– Се работи за дрога која е внесена на црниот нарко-пазар и требаше да резултира со продажба на ова подрачје. Приведен е еден албански државјанин за кој нашите полициски службеници веќе подолго време имаа сознанија дека е еден од главните организатори на овој црн нарко пат и на нелегалната трговија со дрога, изјави Димоски.
Дрогата е запленета, албанскиот државјанин A.T. е приведен, а одземено е и возилото со кое тој ја пренесувал марихуаната. На 42-годишниот жител на албанскиот град Поградец од страна на истражен судија му е одредена мерка притвор во траење до 30 дена.