Опозиционите партии во Советот на Општина Охрид денеска како дополнување на дневниот ред побара Советот да дискутира околу иднината на Студенчишкото блато, како и за неодамнешната продажбата на едно од најатрактивните земјишта под Плаошник.
Не само што градоначалникот Бакрачески и оваа Локална самоуправа немаа слух за граѓаните туку напротив, денеска видовте дека ниту координаторот на ВМРО – ДПМНЕ во Советот не излезе со став зошто не ја прифатија оваа точка. Баравме да бидат поканети претставници и стручни лица, им дадовме време да се подготват за точката меѓутоа претходно овде знаат дека кога ќе добијат налог од шефот, не смее да биде прифатена ниту една точка – рече советникот на ЛДП, Дејан Блажески на денешната седница на Советот.
Тој додаде дека уште еднаш се потврдува дека оваа власт на градоначалникот Бакрачески се ставаат над нормативната власт.
Како опозициски советници ќе продолжиме да се бориме и уште во понеделник повторно ќе го поднесеме барањето точката да се стави на дневен ред на наредната седница – додаде Блажески.
Блажески на денешната седница побара поединечно за, како што рече, јавно да се знае кој бега од одговорност и кој сака да продолжи уништувањето на природното богатство во Охрид. Сите советници од ВМРО – ДПМНЕ гласаа против оваа точка да се стави на дневен ред, чие барање беше потпишано од советниците н СДСМ, ВМРО – Народна партија, ЛДП и НСДП.
Градоначалникот Никола Бакрачески немал впечаток дека граѓаните биле загрижени за урбанизацијата и додаде дека се почитувале сите законски прописи.
Немам никаков впечаток дека владее паника кај граѓаните околу урбанизацијата. За сите урбанистички планови има еден вообичаен законски утврден тек во постоечките закони, а наша обврска е да ги почитуваме принципите и законските прописи. Се она што се носи како урбанистички решенија се носи во законската регулатива – рече денеска градоначалникот Бакрачески.
Тој додаде дека не знаел од каде е впечатокот дека прекумерно или неадекватно се урбанизира градот.
Тоа не е процес кој се одвива зад затворени врати или процес кој може тајно да се договара. Тоа е транспарентен процес во кој се вклучени и граѓаните и многу институции – додаде Бакрачески.
Охридската опозиција бара широка дебата околу плановите за Студенчишкото блато по измените на Генералниот урбанистички план, пренамената за во овој простор и изградба на објекти за домување. Исто така, опозицијата во Охрид побара одговор од градоначалникот Бакрачески и од министерот за транспорт и врски Миле Јанакиески за урбанизацијата во градот вклучувајќи ја и продажбата на едно од најатрактивните земјишта во Охрид во населбата Канео. На денешната седница не присуствуваше советникот од ВМРО – ДПМНЕ, Дејан Пановски кој има сосема различен став од неговите сопартијци околу Студенчишкото блато и зачувување на природните богатства на Охрид.
Ф.Ј.