Ограбени се 162.500 евра од експозитурата на „Македонски пошти” во селото Дебреште, општина Долнени. Според првичните полициски информации грабежот се случил од 15 часот вчера попладнето до изутрината до 7.45 кога било пријавено.
Портпаролот на СВР Битола Ѓоко Стрезовски, информира дека грабежот го открил и го пријавил во полициското одделение во селото Ропотово вработен во поштата кога изутрината дошол на работа.
Полицијата не може да одреди точно кога е ограбена експозитурата, ниту дали е еден или повеќе разбојници. Полицијата трага по лицата кои го извршиле грабежот.