Непознати сторители извршиле тешка кражба во џамијата „Арабат“ лоцирана во комплексот „Арабати баба теќе“ во Тетово при што земале дваесет илјади денари, информираше денеска портпаролот на СВР Тетово Марјан Јосифовски.
Според неговите податоци кражбата била извршена вчера во периодот помеѓу 5 и 12 часот откако сторителите најпрво со употреба на тврд предмет ја скршиле цилиндер бравата од влезната врата, а потоа од металната каса која ја отвориле одзеле 20 илјади денари во разни апоени. Со одземените пари незабележани од никого избегале во непозната насока.
Кражбата во полиција ја пријавил Џ.С.(36), вработен во Исламската верска заедница Тетово. Екипа на полицијата извршила увид и презема мерки и активности за целосно расветлување на пријавеното и за откривање на можните сторители, рече Јосифовски.