Непознати сторители провалиле во манастирската црква „Свети Никола Летен“ во Трница и одзеле пари кои биле собирани од доброволни прилози на верниците.
Според СВР Тетово, провалната кражба, најверојатно се случила, помеѓу 13-ти и 16-ти овој месец, од страна на засега непознати сторители. Од извршениот увид е утврдено дека, провалниците, најпрво го скршиле катинарот од едната од двете влезни врати, а потоа целосно ја пребарале неговата внатрешност. Од метални кутии поставени под две икони, според А.П (60) кој ја пријавил кражбата, одзеле околу 2.000 денари.
Провалниците, исто така, пребарувале и во олтарот, но од таму не одзеле ништо. Извршен е целосен увид и се преземаат мерки и активности за откривање на сторителите.
Во Мавровско-реканскиот крај, минатата година беа регистрирани десетина провални кражби на верски објекти при што беа одземени повеќе икони и доброволни прилози. Годинава ова е прва провала во овој регион.