Порталот Off.net е прогласен за најдобар македонски сајт во 2012 година на третиот избор на најквалитетни интернет-медиуми што се одржа денеска во Информативниот центар на Европската Унија во Скопје.
Второто место во најзначајната категорија го освои „Факултети”, додека на трето се пласира „Курир”.
„Демократскиот и технолошкиот напредок денес се суштински поврзани и меѓузависни процеси. Општествата кои сè повеќе се дигитализираат и се отвораат кон информатичко-комуникациските технологии, се во предност и токму тие ќе ги вкусат плодовите од овој процес. Ме радува фактот што Република Македонија во ниеден момент не заостанува зад светските трендови и иновации во сферата на веб-технологијата, и што македонските сајтови според квалитетот, дизајнот и функционалноста се вбројуваат меѓу најдобрите. Тоа го потврдува и острата конкуренција на веб-страни кои и годинава влегоа во потесен избор за признанието „Најдобар сајт на годината”, пишува претседателот Иванов.
Освен “Оф-нет”, првонаградени во засебните категории се: “Црно-бело” (дизајн), “Мотика” (забавен), “Курир” (информативен), “Суперспорт” (спортски), “Волксваген” (бизнис / корпоративен), “Грид” (иновативен), “Купи книга” (е-трговија), “Борка” (невладини организации), Универзитет “Св. Кирил и Методиј” (образование), “Кајгана” (мобилен), Катастар (владини / државни институции), “Креативен вомиториум” (блог).