Амбасадите на Франција и на Германија 53-годишнината од потпишувањето на Елисејскиот договор од 1963 година, кој се смета за симбол на француско-германското помирување го одбележаа со проекција на филмот „Дипломатија“ од Фолкер Шлендор, германско-француска копродукција од 2014 година.
– Овој договор претставува силен симбол на нашата заедничка желба за соработка во служба на мирот и на пријателството помеѓу нашите два народа. За овој 53-ти роденден јас би сакала да ја изразам желбата разумот и мудроста да продолжат и да ја надминат фаталноста на војните, на спротивставувањата и на државничките разидувања. Француско-германското помирување покажа дека доколку сакате да работите заедно треба секој од вас да направи одредени концесии. Никој не е посилен ако останеме на својата позиција, туку ако се откажеме и заеднички гледаме напред, порача француската амбасадорка Лоранс Оер.
Германската амбасадорка Кристине Алтхаузер истакна дека многу нешта се кажани за Елисејскиот договор, како важен момент во процесот на француско-германското помирување. Таа при тоа ја најави нивната заедничка статија која ќе биде објавена утре на македонски и на албански јазик во два дневни весника. Во контекст на филмот „Дипломатија“ нагласи дека станува збор за многуслоен филм, кој си го поставува прашањето што може да стори дипломатијата.
– Главното прашање е што може да стори дипломатијата. Дали станува збор само за (бескорисно) зборување, кое не може да допре до суштината на конфликтите. Ова прашање е многу актуелно, секојдневно ни е пред очи – во врска со мноштвото кризи во светот, во врска со – за жал и ова е многу актуелно – терористичките организации кои делуваат насекаде во светот, кои не сопираат дури – или токму – ниту пред варварските уништувања на културата во Сирија, Ирак, Мали, рече амбасадорката Алтхаузер.
Инаку, годинава за прославата на Елисејскиот договор беше промовиран и нов француско-германски проект во Македонија насловен „Фудбал без граници“. Како што истакна Оер, целта на проектот е промовирање на културната разноликост, етничките вредности, индивидуалниот ангажман и заедничкиот ангажман во служба на заеднички вредности. Оваа идеја, како што нагласи таа, потекна од германската Амбасада, а е во контекст на претстојното Европско првенство во фудбал што ќе се одржи во Франција.
Во 2014 година амбасадите на Франција и на Германија реализираа проект заедно со Асоцијацијатајта на наставници по историја на темата „Прва Светска војна“, а минатата година француски, германски и македонски експерти дебатираа на тема за заштитата на животната средина, во пресрет на Париската конференција КОП 21.