Во организирана акција Агенцијата за храна и ветеринарство, во саботата на патниот правец Дуброво – Кичево, од три лица, одземала 232 тегли без соодветни ознаки со непозната супстанца, кои се продавале како мед.
По извршената инспекциска контрола од официјалниот ветеринар, како што соопшти денеска Агенцијата за храна и ветеринарство, земени се мостри за испитување. Согласно законските и подзаконските акти кои ја регулираат безбедноста на храната, казната за фалсификување мед изнесува 5.500 евра во денарска противвредност.
Според соопштението, едно од лицата е познат сторител на ваков прекршок, односно и досега е казнувано за истото дело.
По дојава од граѓанин, како што е наведено, истиот ден инспекциските служби на Агенцијата, од државјанин на Република Албанија, на пазарот во Кичево, одземале ветеринарно – медицински лекови шверцувани од Албанија, кои тој ги продавал без соодветна декларација. Станува збор за 50 дерма спрејови, 1.000 таблети „албендозол“, 10 шишиња „евита селен“, девет шишиња антибиотик „пенстерп“ и едно шише хормон „окситоцин“. Одземени се и две шишиња вакцина против клостридиум, две вакцини за мали кучиња и прашок и вакцини за гулаби.
Одземените ветеринарно – медицински лекови ќе бидат уништени.
Акција е реализирана во рамки на засилените контроли кои ги вршат инспекциските служби на Агенцијата, на производителите, преработувачите и трговците со мед, со цел спречување на продажба на производи кои се декларираат како мед, а не ги исполнуваат основните критериуми од Правилникот за квалитет на овој прехранбен производ, како и за прекинување на синџирите од производители, дистрибутери и продавачи на фалсификуван мед во регионот.