Судското рочиште за случајот „Шпион“, на кое денеска за прв пат требаше да даде исказ новинарот Зоран Божиновски е одложено.
Од скопскиот кривичен суд соопштија дека судијката Сандра Крстиќ побарала од лични и семејни причини да биде прераспределена во друг оддел. На нејзино место е ставена судијката Ленка Давиткова.
Божиновски беше дел од предметот „Шпион“, но постапката за него беше одвоена бидејќи тој беше недостапен за органите на прогонот. Божиновски е во притвор од 21 април, кога беше екстрадиран од Србија.
На минатото рочиште Основниот суд Скопје 1 – Скопје информираше дека не може да ги добие доказите за Божиновски бидејќи предметот „Шпион“ сè уште е во Апелациониот суд.
Според обвинителниот акт, Божиновски се товари за злосторничко здружување, шпионажа и уцена.
Божиновски од минатата недела започнал штрајк со глад поради неоправдано продолжување на притворот и одолжување на судскиот процес, а неговата здравствена состојба е сериозно загрозена.
На 1 септември, кога беше одложено првото судско рочиште, ЗНМ протестираше пред Судот, барајќи негово ослободување од притвор.
Специјалното јавно обвинителство, кое веќе го застапува во втор степен случајот „Шпион“, ја бара надлежноста и врз предметот на Зоран Божиновски, која сѐ уште е во Обвинителството за организиран криминал на Марко Зврлевски и на Јован Илиевски, бидејќи Советот на јавни обвинители одлучи дека СЈО немало надлежност.