Првата пратка вакцини против Ковид-19 во земјава нема да пристигне утре како што беше најавено. Предавањето на вакцините кое беше закажано на граничниот премин Табановце кога српскиот претседател Александар Вучиќ требаше да ги достави вакцните е одложено. Пратката требаше да ја пречекаат премиерот Зоран Заев и министерот за Здравство Венко Филипче.
„Ве известуваме дека заради потребата од усогласување на техничка документација околу доставувањето на вакцините, настанот кој беше најавен за утре на граничниот премин Табановце се одложува за друг датум следните денови, за што дополнително ќе информираме“ – стои во дописот од Министерството за здравство.
И од кабинетот на претседателот на Србија, Вучиќ објавија дека предавањето на вакцините се одложува поради дополнување на техничката документација.