Шестата седница на Комисијата за европски прашања, на која што на дневен ред беше второто читање на предлог-законот за употреба на јазиците е одложена.
– За датумот на одржување на седницата ќе бидете дополнително информирани, соопштија кусо од КЕП, без да ги наведат причините за одложувањето.
До Комисијата се поднесени 90 амандмани по предлог-законот за употреба на јазиците.
Најмногу од поднесните амандамни се на опозициската ВМРО-ДПМНЕ, 84, четири се на СДСМ и два на Беса.
Инаку, пратениците претходно ја изгласаа потребата од носење ваков закон по собраниската распрва на нацрт-текстот по прво читање. Според Деловникот, законот сега треба да се врати во матичната комсијата, а бидејќи е со европско знаменце, за него надлежна е Комисијата за европски прашања.
Амандманската расправа во Комисијата беше закажана за утре во 15 часот. Седницата треба да трае три дена по што законот повторно се враќа пред пратениците на пленарна седница.
Во меѓувреме, здружението Македонски национален совет постави шатори пред Собранието барајќи повлекување на законот за употреба на јазиците.