По повод одбележувањето на „Меѓународниот ден на борбата против фашизмот и антисемитизмот“ денеска ќе биде потпишан првиот Mеморандум за соработка меѓу Еврејската заедница во Република Македонија, Институтот за културно и духовно наследство на Албанците – Скопје, Институтот за национална историја – Скопје и Меморијалниот центар на холокаустот на Евреите од Македонија.
Меморандумот ќе биде потпишан со цел продлабочување на соработката помеѓу овие четири институции, а воедно и пример за меѓуетничка и меѓуверска почит и разбирање. Овој чин претставува признавање на заедничка желба за спречување, справување и превенција на омраза и насилство кон било која етничка или верска група.
Со потпишувањето на Меморандумот за соработка и официјално ќе започне проектот „Соочување со минатото – граѓанска храброст во опасните времиња“.
На потпишувањето на Меморандумот, што ќе се одржи во Меморијалниот центар на холокаустот на Евреите од Македонија, најавено е присуство на американскиот, израелскиот и германскиот амбасадор во земјата и други високи претставници на дипломатскиот кор акредитирани во земјата.
На присутните ќе им се обратат претседателот на Еврејската заедница во Република Македонија Берта Романо Николиќ, директорот на Институтот за духовно и културно наследство на Албанците – Скопје д-р Скендер Асани, директорот на Институтот за национална историја – Скопје проф. д-р Драги Ѓорѓиев и директорот на Меморијалниот центар на холокаустот на Евреите од Македонија Горан Садикарио.