Под мотото „Соработувај за безбедна вода“ денеска се одбележува Светскиот ден на водата – 17 март. На овогодинешното одбележување акцент се става на значењето на соработката во управувањето на ограничените ресурси на вода во светот.

– Светската здравствена организација, квалитетот на водата за пиење го категоризира во дванаесетте основни показатели на здравствената состојба на жителите на една земја, со што се потврдува нејзината значајна улога во заштитата и унапредувањето на здравјето.

– Годинава целта на Институтот за јавно здравје на Република Македонија, освен пораката што ја носи Светскиот ден на водата, е отворање нови канали на комуникација и соработка за управување со водите во светот кој сé повеќе ги зголемува барањата за достапност, алокација и одржување на изворите на слатка вода. Затоа апелирам до граѓаните да ја чуваме водата за генерациите кои доаѓаат, истакна Шабан Мемети, директор на Институт за јавно здравје на Република Македонија.

Од 1993 година, светот го одбележува 22 март како ден посветен на значењето на водата, со цел  да се подигне јавната свест за оддржување на безбедноста на слатката вода, како и оддржливо управување со изворите на водата за пиење.

Декадата 2005-2015 година се одбележува под слоганот “Вода за живот”. Оваа година одбележувањето на Светскиот ден на водата во Македонија се одвива во координација со Националната Канцеларија на УНЕСКО.

– Овој ден, всушност, е повик за акција на целото човештво дека сите мора да се здружиме и заедно да работиме за заштита, обнова и подобро управување со природните ресурси со цел да обезбедиме чиста вода, а со тоа и храна за секој граѓанин на светот, сега и во иднина, рече Лидија Топузовска, генерален секретар на Националната канцеларија на УНЕСКО во Република Македонија.

Дел од денешната манифестација беа и македонските производители на пакувана вода кои се претставија со свои штандови. Волонтерите на Црвениот крст за времетраењето на настанот дистрибуираа вода до случајните минувачи во населбата  Аеродром.

Програмата содржински беше збогатена со учество на жонглери и музички настапи, како и претставување на уметнички дела на учениците од сите основни училишта во општина Аеродром на тема „Соработувај за безбедна вода“.

Институтот за јавно здравје на РМ по повод овој ден, а во име на значењето на водата за оддржување на доброто здравје, заедно со претставникот на УНЕСКО и производителите на пакувана вода како партнери донираа пакети вода во пензионерскиот дом во населба Аеродром.